Pedanda: Asu Sane Kapademang Patut Kaprateka

Denpasar (Antara Bali) - Sinalih tunggil pedanda utawi pemuput upacara agama Hindu ring Bali mapakeling mungguing asu-asu liar sane wewengan mangkin kapademang sangkaning kajejehang nglalahin penyungkan rabies, kebaos patut kaprateka utawi kaupacarain, sane tetuekipun mersihin atman asu utawi "suksma sariran" asu sane sampun kapademang punika.

"Asu-asune punika patut kaupacarain 'darma pangulih' mangda atmanipun nenten malih nyrewadi dados buron malih, mekadi asu," kadi sapunapi kabaos antuk Ida Pedanda Gede Telaga saking Geria Gde Telaga Sanur majeng ANTARA ring Denpasar ring galahe sampun lintang.

Ida Pedanda Gede Telaga mahbahang, yanin ring ajah-ajahan agama Hindune, sakaluir baburon patut kaprateka. Yan mapaiketan ring sasoroh baburon, kebaos wenten upacara khusus sane kaucukang ring buron sane mabatis asiki (ubur-ubur), mabatis kekalih miwah sane mabatis patpat.

Yadian nenten kaprateka siki-siki majeng asu-asu sane kapademang, nanging upacara gebogan kebaos patut kamargiang. Ring galahe sampun lintang, pejabat saking Pemprov Bali sampun mapaiguman sareng pamucuk agama, ngeninin paindikan puniki.

"Mungguing tetuek saking upacara punika, kebaos boya tios wantah 'ngruwat' utawi nyomyang roh jahat" kadi Ida Pedanda Gede Telaga.

Manut Ida Pedanda Gede Telaga, kasuyaktianipun majeng krama Bali sane meagama Hindu, tan kapatutang pian amati-amati sakaluir sane maurip. Yadian punika, ri kanjekan puniki, sangkaning karasa mabaya pisan kawentenanipun, mawinan ngamademang asune puniki kawenang.

"Dadosnyane yanin cingak saking permargi 'ritual', pelaksanane amati-amati puniki kebaos nenten sapunapi, sangkaning kawentenan penyungkan rabies puniki gumanti mabaya pisan. Dados kawentenan kadi puniki wantah buat kamargiang," baos Ida Pedanda.

Antuk kawentenan panyeda utawi kritik sane maosang pidabdab pemerintah wantah kageso-geson, manut Ida Pedanda, pemerintah wantah tan dangan sajeroning mapikamkam, nanganin wicarane puniki. Napi mawinan punika, santukan asiki kapatut nyaga krama druene mangda prasida selamet rahajeng, nanging ring indike tiosan, kapatut mangda ngaweratiang pabuat kramane sane tan setuju.

Ida Pedanda taler maosang, kawentenan penyungkan rabies sane nibenin puniki kasuyaktianipun sepisan pinaka piteket utawi pakeling majeng parajanane ring Bali, mangda miara asunnyane sane sebecik, saha sampunan kantos banggianga maseliweran ring margi-margine.

Kebaosang, wewengan mangkin makweh kramane sane tan uning ring indik kasehatan asu, sane sapatutnyane mangda setata kapiara lan kavaksin. Coba yanin asu-asune punika kapretenin sebeciknyane, janten tan wenten wicara kadi puniki, baos Ida Pedanda. (*)